Tukhal Ṭha

29Jan2012

Johan 10:11

Tukhal tha cu keimah hi ka si. Tukhal tha nih cun a tuu hna caah a lu hloh kha a sian. (Johan 10, Salm 23, Ezekiel 34 rel)

Tuu cu innzuat satil phun ansi i a nenno ngaimi le mahte in ral aa veng kho lomi ansi. Felte le tha tein zohkhenh le kilven an hau. Cucaah khaltu an herh zungzal. Khaltu nih hin a tuu hna an paw a khim i an tihal a riamhnak hnga ramhring lak ah tlon ter i ti pawng ah hruai asi. Culawng silo in saral ka le mifir kut in an himnak hnga chun he zan he kilven peng asi.  Tukhal thalo(hlan chom tukhal) nih cun hlanman tangka hmuh ding, tuu hnuk din ding le an sa ei ding, le tuhmul in a miakmai hmuh ding lawng a ruah. Tuu an rawl a tam maw tam lo, an ti a hal maw hal lo, an him maw him lo, saral le hmarung an tong maw tong lo, an tling maw tling lo..timi pawl kong ah a buai huam lo. Tukhal tha nih cun cu vialte cu thate in a zoh dih, a chek dih. Saral ka le mifir damiah kut in an himnak hnga nunnak pek a herh ahcun pek ding in timhcia asi. A hmuh dingmi tangka kong ah a buai lo. Tuu le a ngeitu cung ah dawtnak taktak a ngei.

Tukhal tha le thalo cu an tuu sining nih a langhter. Tukhal a that lo ahcun tuu pawl an rawl a tam peng. An ti a haal zungzal. An der chin lengmang. Hmarung an tong. An tlawttlau. Mi nih an fir hna i turun chung tuu cu nihkhat hnu nikhat in an zor chin lengmang. Tukhal tha nih a khalhmi turun cu an paw a khim, an tihal a riam, an dam, an thau i an miltlor. An karh chin lengmang i turun nganpi ah an i chuah.

Pathian cu tuu ngeitu asi . Jesuh cu tukhal tha asi i kan nih cu khalhmi a turun kan si. Hlanchommi tukhal bantuk in a kan khal lo. Kan herhmi ti le rawl, hniphuan hna le dornak inn le lo a kan pe tu asi. Sa le ral phun zakip le harnak phun zakip chung in a kan veng tu le himnak a kan pe tu asi. A kan zohkhenh i a kan umpi zungzal. Kan zawt le kan fah tik ah a kan tlop i damnak a kan pek. Amah nih a kan khalh caah zeihmanh tih awk a um lo. Mifir le damiah ra hmanh hnaseh, cenghngia le chiandeih ra hmanh hnaseh, dotu le raltu tampi um hmanh hnaseh, a mitsir in a kan ven zungzal. Thiangthunh le tanbo he a kan congh ko.

Harnak kan ton ah cun Bawipa chim usih. A kan bawmh lai. Kan herhmi a um ahcun amah hal usih. A kan pek ko lai. Kan caah a lu tiang a hlo siang tu tukhaltha kan ngeih hi mi vantha kan va si dah. Cuthluk a thami le dawtnak a ngeimi Bawipa cu a min thangthat zungzal awk asi. Kan i bochan awk a si. A sin ah lunglawmhnak rai kan thawi peng ding asi.