Thluachuah Lungthu

13Jan2012  

"Hal u law an in pek hna lai, kawl u law nan hmuh lai, king u law inka cu an in hun piak hna lai. Zeicahtiah a halmi paoh cu pek an si lai ia kawlmi paoh nih cun an hmuh lai i a kingtu paoh cu inka kha hun paik an si lai.(Matthai 7:7-8)

Lai khuate lei kan lungthu le kan tappi mitthlam ah cuan ter hmanh. Lungthu pathum a ruang tein a dir lawng ah bel to a rem i tha te in chuankhin khawh asi. Pathian thluachuah tlamtling don nak ding ah lungthu pathum bang a ruang tein a dir dingmi thil pathum an um. Cuhna cu hal, kawl le kingh an si. Kanmah leikap tuah ding a si.  Vun zoh hmanh usih:

Hal: Kan herhmi cu Pathian sin ah hal ding a si. Cucu thlacam ti zong in kan ti khawh. Duhmi le herhmi hi a dang ngai. Pathian nih kan duhmi nak in kan herhmi a kan hmuh piak deuh. Pathian i bochan hi i palh sual ah cun tih a nung tuk. Hal thlorh in hal hi a herh lem lo. Belti kan khin ciami ah Pathian nih fang vun thlah seh ti kan duh. Kan kaa vun keu seh law darkeu in rawl kan tuh teh ti kan duh. Kan ban in kan rawt seh lawh biakinn kan luhpi seh ti kan duh. Ca zoh lo te in awn kan duh. I thlop lo te in dam kan duh. Nain cuticun a si lem lai lo.

Kawl: Nunnak, damnak, fimtthiamnak, thazang le thawnnak a kan pek. Cucu hman ding an si. Kan herh i kan halmi kawl nak ding caah hman ding an si. Hal thawn ngang ko zong ah kawl le hawl kan huam lo tuk hrat ahcun kan chambau peng ko lai. Zu le va hmanh ti lo le rawl lo in a chia hna lo ti hi i thlaih tuk ding a si lo. Zu le va tete khi an buchung an um bu ah ei awk an hmuh tung lo. Mui le zan ah, sa le ral lak ah nunnak thap in pei ti le rawl an kawl i an paw a khim ve ko cu. A hal kan thawn tluk in a kawl kan huam ve a hau.

Kingh: Pathian nih thluachuah pek hi a kan duh zungzal. Thluachuah inka kingh kan daithlan tuk caah inka hun piak kan si lo. Cucu a kan pek ciami thluachuah hna hi hmang in a mah sin pekchanhnak, sifak santlailo bawmhchanhnak le mi dang nun va hrawmhnak in kan kingh ding a si. Hmuh lei lawng duh i pek sian lo cu khiar le hakkauh asi. A lut a um bantuk in a chuak a um ve awk a si. Mi bawmhmi si duh i mi bawmtu si hrial cu a dik lomi lungput a si. Cucu awkhlawh lungput a si. Pek awr le thenh to kan si tinak a si. Thluahchuah inn ka kan kingh deuh paoh ah kan hrai cu a liam chin lengmang ko lai.

Cucaah thluachuah lungthu pathum asi mi hal, kawl le king hi a ruang tein kan bunh ah cun kan belti tlawh a tha lai. Kan rawl a hmin lai i kan paw a khim ko lai. Pumsa rawl he thlarau rawl he a khim lai.