Thinlung Innka
28J1n2012
Biathlam 3:20
Ngai hmanh, innka ah ka dir i ka kingh. Ahohmanh an si ah, ka aw a thei i innka a ka hunh mi cu, a inn chungah cun ka lut lai i a sinah rawl ka dum lai i amah zong ka sin ah a dum ve lai.
Biaknak dang ahcun minung nih biakmi kha a kawl hmasa tawn. Khrihfa biaknak ahcun cutin asi lo. Pathian tunih minung a kan kawl hmasa. Kan hngalh lo lio le sualnak khuamui chung kan um ko lio ah a kan kawl. Kanmah he i pehtlaih peng le kan sin ah khuasak a duhmi Pathian asi. Kanmah he naih-niam tein um a duh zungzal. Cucaah a sannak in a rung tum , a kan kawl i neemte in a kan auh. Thin fual in a kan hngah.
Jesuh nih kan lungchung ah luh a duh. Kan chungkhar ah khuasak a duh ve. Kan sin ah a ra i innka a kingh lengmang. Awneem tein "innka rak ka onh u" a kan ti. Kan sin a rat cu thluachuahnak he asi. Laksawng phuntling he asi. Nunnak duhdim pek duh ah asi. Sehtan zong nih kan innka a kingh peng. A aw a neem tuk ve. Anih cu fir duh le hrawh duh ah a rami asi. Siknak le buainak pek awk ah a ra. Sunghnak le zatlaknak pek awk ah a ra. Mitampi nih Jesuh aw le Seitan aw kan thleidang kho lo i kan i cuahsual theu. Jesuh aw le sehtan aw hi tha tein kan ngaih i kan thleidan thiam a hau.
Innka kingh thawng kan theih tik ah micheu nih cun fek chin i kan hrenh. Setan nih cun achung luh awk ah hranhram in innka cu bauh a timh tawn. Hi caan ah fek chin in kan hrenh i raltha tein kan rak doh ding asi. Jesuh nih cun innka hram in lungsau tein a kan hngah. Kan on lo zong ah hranhram in innka bauh a tim bal lo. Ngaihchia le lungkuai in a kan kirtak ko lai. Thluachuahnak hi Jesuh kut cungah a um. Amah Jesuh vial innchung luh ter sianh tung loin a thluachuahnak lawng innchung luh ter kan duh theu. Hitihin cun a ngah lo. A ngah hrimhrim lo.
Mi zeimaw nih Jesuh aw an theih cun a rannak in innka cu an on. Jesuh a lut i an sinah khua a sa. Amah nih a pen hna caah Pathian sunparnak cu lianngan chin in an hmuh. Dawtnak a leeng i daihnak le hnangamnak an co. An nunnak cu lawmhnak in a khat.
Hawidawt hna, Jesuh le Sehtan ah hodah innka kan onh lai? Innka cu fek chin in maw kan hrenh lai, kan on lai dah? Kanmah pumpak nawl cio asi.
