Pathian I Thim U Sih
By Saya Stanley Cung
15Jan2012
Joshua 24:15:- “Kei le ka inn chungkhar tu nih cun Bawipa kha kan biak ko lai.”
Israel miphun pawl Egypt sal an tan nakin Pathian nih Moses hmangin a chuah pi lio hna ah thil biapi tukmi pakhat a um. Cucu hi hi a si: “Sal i nan cannak inn chung, Izipt ram chungin an chuahtu hna cu Bawipa nan Pathian hi ka si” ti a si (Exd. 20:2; Deut. 5:6). A sullam cu keimah lawnglawng hi nan Pathian cu ka si i keimah lawnglawng hi nan ka biak lai, ka rian nan tuan lai ti hi a si ko.
Moses a thih hnu ah Joshua nih a hruai hna. Joshua nih Israel miphun pawl kha Shekhem ah a pumh hna i a zuamcawh hna. Israel miphun pawl an pangkam ummi hi pathian tampi a biami lawngte an si. Cun Israel miphun i an pupa hna hrim zong hi pathian tampi a rak biami an rak si ve. Joshua nih tu chun ah i thim cang u, Yahweh maw nan biak lai, midang pathian pawl dah tiah a zuamcawh hna.
Joshua nih Israel pawl a zuamcawh hna hlan ah thil pakhat theih ter a duh hna. Cucu Joshua 24:1-13 chungah kan hmuh: “Nan rak thlawh lomi ram le nan rak sak lomi khua hna kha kan pek hna i khika ah nan um; nan phun lomi mitsurruang le olive dum theitlai khan an ei.” Joshua nih hi bia a chimh hna nak a ruang cu Pathian nih an cungah zeibantuk thluachuah le thil lianngan hna dah an tuanbia ah a rak tuahpiak hna timi kha philh loin thei than hna seh ti a duh ruangah a si.
Mi tampi nih a liam cangmi kong cu a biapi lo, atu le hmailei kong lawng ruat u an ti tawn. Asinain tuanbia timi hi a rak biapi tuk. Kan tuanbia van ruat than hna u sih. Kan nunnak lamthluan, kan tuanbia chungah Pathian zeitluk in dah a that, Pathian sinin zeibantuk thluachuah hna dah kan hmuh? Pumpak kan nunnak, chungkhar kan nunnak le kan miphun, kan ram kong ruat than hmanh u. Harnak timi tampi kan rak tong ko. Asinain tha tein ruah setmat ahcun Pathian thluachuah a rak tam deuh thiamthiam. Cucaah kan tuanbia chungin thluachuah rel hmasat ding kan sawm hna.
Pahnihnak ah kan chan hi a thangcho tuk lawmmam cang i minung hi rang piin tlik kan hau ve. Rang tuk kan tliknak ah kan i manh lo chin lengmang. Cucaah Pathian biaknak ca zongah caan kan pe kho lo deuhdeuh cang. Chungkhar um ti caan zong a tlawm chin lengmang bantukin Pathian i thim i thangthatnak caan zong a tlawm chin lengmang cang.
Kan pawngkam ah pathian dang a biami an um fawn. Kan pawngkam ah pumh hau loin a ummi tampi an um. Harnak le hneeknak hau loin biaknak a hmangmi tampi kan pawngah an um fawn.
Kan chan a thancho bantuk in kan pawngkam ah Pathian can ai ah hman khawh sual ding thil tampi an um fawn (today’s idols): phaisa, internet, tv, etc.
Kannih zong hi challenge tuahmi kan si cang. Zeidah kan i thim ve lai?
Joshua le Israel miphun pawl nih cun Yahweh kha an i thim. Yahweh rian lawnglawng kan tuan lai an ti. Anmah bangin kannih zong Pathian lawnglawng hi i thim peng ko hna u sih. Judah mi nu le pa nih an fale kha Yahweh Pathian an philh sual nakhnga lo an cawnpiak peng hna. An i cawnpiakmi hna cu, “BAWIPA hi kan Pathian a si, BAWIPA lawnglawng hi; BAWIPA na Pathian cu na lung vialte le na ruahnak vialte le na thawnnak vialte in na dawt lai,” (Deut 6:4-5) tihi a si. Kannih zong kan fale caah rosung bik cu Pathian i thim le biak le a rian tuan lawnglawng hi si hram ko seh.
