Tiva Nung

29Jan2012

Johan 4:13-14

Jesuh nih cun, "Hi ti a dingmi paoh cu an ti a hal than lai; sihmanhselaw keimah nih ka pek mi ti a dingmi paoh cu zeitikhmanh ah an ti a hal than ti lai lo.Ka pekmi ti cu a chungah cerh ah a cang lai i cu cerh nih cun nunnak a pek lai," tiah ati.(Johan 7:37-38, Isaiah 55:1, Ezekiel 47:1-12 relchap)

Chun nilinh tur ling, thilrit he cho vun kai, kan thlan nih a kan ciah cikcek,  kan ti a hal tuk ah cil chak awk hmanh ngei lo in kan dang zong a caar dih hnik, cu lio ah cho vun chuah i naideem tang lungdonh cung ah thilrit vun thumh, thlihir vun i chem ter pah in khuhlu a uai nawnmi pum hnih vun khai, cu i hranthawl in tikik te vun i birh cu a thawt tuk ah a thlum. A nuamh zong a nuam tuk fawn. Ti haal a riamh tuk ah thabat zong a dam dih. Sinain inn phak hlan ah kan ti a hal than thiamthiam i din kan duh rih ko. Jesuh pekmi ti  din ahcun ti a haal than kho ti lo.

Hi bible bia hi Jesuh le Samaria minu an i ton lio ah Jesuh nih a chimmi bia asi. Samaria minu hi sikho sehlaw cu leeng chuak lo in inn chung ah i erh peng a duh mi asi. Sinain minung nih ti lo in nun khawh asi lo caah ti than awk i a va chuah caan te ah Jesuh he an va ton hi asi. Hi minu hi mi thangchia le mi muaalpho, mi vialte nih hrialmi le hnonmi asi. Mi hmai khah lo nak nih innchung ah a hren peng. A nunnak nih hawi a hlam tuk ko. Misin chuahlangh a duh tuk ziar ve ko. Sinain ningzahnak le phuhrunnak nih a khenkham caah aa thuhnak asi. Mitampi cu kan sualnak, kan sifahnak, kan hruhnak nih hawisin chuak ngam lo in a kan tuah ve. Biakinn hmanh panh ngam lo in a kan tuah tawn ve. Jesuh  cu sualpalh aa phuhrung i a thupmi hna, mi vialte nih hrialmi le hnonmi hna, hawikom vialte nih hlawt a tongmi hna kan caah hawikom tha asi zungzal. A kan hrial bal lo. A kawl tuin a kan kawl lehlam. Kan thanghciatnak nak le kan mualphonak, kan hruhnak le kan sifahnak hrawmpi a kan duh. A kan zahpi bal fawn lo.

Minu nih than awk ah a kal hnawhmi cu than lengmang a haumi ti asi. Sihmanhsehlaw a nunnak i a rak haal taktak mi cu hawitha asi. Chanhtu le bawmtu asi. Ngaihthiamtu asi. Cucu Jesuh nih a hngalh. Amah cu minu nih a haalmi ti a ngeitu asinak kong a chimh nain fawibai ah a fian lo caah bia tampi a hal. A hun fian cun Jesuh cu khamtu le bawipa ah a cohlan i a pekmi thlarau ti cu riam cikcek in a din. Ningzahnak le mi hmai khahlonak an lo dih cang. Jesuh dawtnak le thatnak kong, a hmuhmi le a theihmi cu midang sinah chim lo le phuang lo in a um kho lo. A huatu le a raltu, a sawitu le a thangchiat tu hna sin zong ah siaherhnak he Jesuh dawtnak kong cu a chim ko. Teirul chamnak duhnak lungthin a ngei lo. Cucu zeiruang ahdah asi khawh hnga? A lung chung in tiva nung a put cang caah asi.

Rili ti din cu mi ti a halh chin. Riamh a um kho lo. Vawlei chawva le nuamhnak ti zong nih nun diriamhnak taktak a kan pe kho lo. Cim le vuai a um kho lo. Kan duh chin. Jesuh ti hi tlarau ti asi. A ti a halmi paoh nih man lo in din khawh asi. Sifak le mihrut zong nih din khawh asi. Mi sual le mi palh zong nih din khawh asi. A dingmi paoh an ti hal a riam. An i lawm. An hninghno. An nunnak ah tiva nung a put i mi dang zong nih an din chin hna. Jesuh cu a reu bal lomi nunnak tikhur asi. Jesuh nih, "Ra ulaw ra ding u" a kan ti. Atu panh cio usih.