13Jan2013

Pathian nih, "Nanmah cu zangfah kan duh hna caah kha caan ah khan nan bia cu ka rak in theih piak hna i, Khamh kan duh hna caah kha ni ah khan karak in bawmh hna," tiah a rak chimmi bia kha ngai hmanh u. Pathian zangfahnak hmuh caan cu a tu caan hi a si i khamhnak hmuh nih cu nihin ni hi a si.(2Kor.6:2)

Israel miphun Egypt ram in Kanaan ram lei panh in an kal lio ah Pathian nih lam a hruai hna. An hmaika ah Pathian thiltikhawhnak khuaruahhar cu zingzan in an hmuh peng. Sihmanhsehlaw Pathian cu an rak hlawt lengmang. Pathian can-ai ah sui cawfa hna an biak. Pathian thimmi Moses cung ah an zai. Hi caan zong ah Pathian nih a hlaw hna lo. A bawmh thiamthiam ko hna. An harnak a hmuh. An aw a theih. Harnak chung in a rak khamh hna. Dawtnak le velngeitu Pathian a sinak cu an cung ah a langh ter peng.

U le nau hna, nitin kan nunnak ah Pathian nih lam a kan hruai cuahmah ve ko. Mi tampi nih cun Pathian cu kan hlawt riangmang i sui cawfa  tu kan thangthat. Kan laam, kan kui. Thluachuah petu Pathian philh in pekmi thluachuah tu kan sunhloih deuh. Riantuantu le hruaitu upa cung ah kan phunzai tuk. Sinain Pathian nih cun a ka hlaw lo. Luat ter a kan duh. Khamh a kan duh. Kan caah a vel a ngan tuk. A dawtnak a thuk tuk. Caan tha a kan pek rih. Nihin hrimhrim ah amah lei ah i mer cang usih. Thaizing ah kiptuh ah ti sual hlah usih. Khitik ahcun a tlai tuk cang lai.

Nihin ah hin nuncan khuasaknak kong ah kan harsa tuk maw? Lungrethei le thin phang in kan um maw? Ruahchannak ngei lo in kan vai maw? Sualnak le thatlonak lei ah kan pil tuk maw? Seihtan temtawnnak hri nih a kan ngerh tuk maw? Cuvialte chung in luat awk le khamh awk ah Pathian kan auh ahcun kan aunak aw a theih lai i a kan khamh ko lai. Salm 34:18 ah, Lung a dong mi kha Bawipa nih a umpi hna i ruahchannak a ngei lo mi kha a khamh hna a ti. Hihin hi caantha bik a si.

Mirang phungthluk: One today is better than ten tommorows.