Mitsur Ruang le A Nge

16Jan2012

Johan 15

Keimah ahhin i peh ko ulaw kei zong nanmah he ka peh ve lai. Mitsur nge nih amah te in thei a tlai kho lo, mitsur ruang i aa peh lawnglawng ah a tlai kho... Mitsur ruang cu keimah hi ka si i a nge cu nanmah hi nan si... Thei tampi nan tlainak thawng khan ka Pa sunparnak kha nan langh ter...

Zumtu hna nitin kan nunnak ah thei tha tampi thlai ding hi Jesuh nih a kan duh. Hnah he lawng hring deldul i um ko tiang lawng kha a za lo. Kanmah tein thei tha tlai awk ah kan i zuam. Sinain sau a kan nguh lo. Kan tlai kho cawk lo. Kan tlai tawnmi hmanh a thlummi le a thawmi thei silo in a khami le a thurmi thei tu an si. Cucu a ruangpi taktak asi mi Jesuh ah kan i peh hmasa lo caah asi. Amah ah a pehmi cu theitha tampi an thlai kho.

A ruangpi asi mi Jesuh ah a peh lo mi mitsur nge cu san tlaihnak a ngei lo. Caan zeimawzat chung cu a hnah a hring ve ko nain ni tlawmpal a hun linh cun a uai i a caar dih zau. A ruang ah tha te in aa pehmi nge dang caah than dawn le hnahnok men a si. Cucaah lak i meiphun chung peih lawng kha a taang ko cang. A caah ruahchannak zeihmanh a um ti lo.

A ruangpi asi mi Jesuh ah aa peh mi a nge cu hring dildel tein an um i dornak tha thladem asi pin ah a caan hman tein theipar tha an chuah. Dum ngeitu le midang caah san an tlai. Lawmhnak, khimnak, le damnak pe tu an si. An theitha tlainak thawng in mi tampi nih Pathian sunparnak an hmuh. Mitsur ruang ruang khat in a corh timi an si caah, nang maw kei tiin thleidannak a um ti lo. Nahchuah ziarngeihnak le en-tainak a um lo.Dawtnak le zawnruahnak tu in an i ngerh i an i tem tawn dih.

Jesuh ah aa pehmi hna nun cu duh a nung hringhran. Cucu lawmhnak nun a si. Dawtnak nun a si. Vulei hi an caah a nuam zungzal. Chungkhar ah dawtnak a leng zungzal i nihthlam lawng a leng. Huatnak, nahchuahnak, nih hmun an ting ti lo. Lawmhnak par an tlan ti i dawtnak thei an ei ti. "Aw...a va nuam e Jesuh he nun cu!" an ti zungzal.(Isaiah 5:1-7 rel chap)