Jesuh Daihnak

Johan 14:27

Daihnak kan chiahtak hna, keimah daihnak cu kan pek hna. Vawlei nih an pek hna bantuk in kan pe hna lo. Lungrethei le vansang au in um hlah u; nan thin zong phang hlah u.

Minung nih nitin kan nunnak ah hin lungretheihnak le lungnuamhlonak tampi kan ton tawn. Kan duhlo ning in thil a kal tik, herhbaunak nih a kan tuam tik paoh le saduhthah an tlin lo tik ah lungrethei le vansang in kan um. Cucaah vawlei cu duhtlin lonak ram, harsatnak in a khatmi vawlei asi tiah vawlei a chiatnak lei in a hmu tu kan tampi.

Ni fatin thawngpang kan ngaih tikah meitlang puah ruang, li hnih ruang, inn kangh ruang, bomb puah ruang, meithal kah ruang, tilianh le tilet thawh ruang, thlichia hran ruang,mincimh ruang...cu ruang.. kha ruang... ah minung cuzat an thi i cuzat hma an pu, ti lawng te kan theih tawn. Vawlei hi buainak lehnahnawhnak minmei nih a zelh dih taktak ko.

Kan lungthin nih hin daihnak a duh i thalpi ti haal bang a haal zungzal. Cu daihnak hmuh khawhnak ding ah lam tampi in kan kawl. A cheu nih vawlei chawh le va, fimnak le thiamnak, le duhcuai nunnak in kan kawl. A cheu nih hriamnaam  he kan kawl. Daihnak caah tiin ral i doh le i thah-nawnnak a tampi. Pakhat le pakhat, ramkhat le ramkhat cabuai cung thutnak in daihnak khua kan khan. Sihmanhsehlaw hi thil vialte hna hi daihnak caah tlam an tling kho taktak lo. Lenglei daihnak lawng ansi i chikkhat ah an lo dih than. 'Ka hmuh cang tiah ka ruah tikah, annih an lo dih cang' timi hla kha a si ko. Vawlei mi kan sirih caah vawlei daihnak zong cu kan kawl a herh ve ko nain cunak in a biapi deuh mi chunglei daihnak kan kawl hmasa herh. Cucu Jesuh pekmi daihnak asi.

Jesuh cu DAIHNAK BAWI asi i amah pekmi daihnak cu zungzal hmunmi daihnak asi. Thlarau daihnak asi. Hi daihnak cu kan si a fah ko le kan hruh ko zong ah ngeihmi daihnak asi. Mi sal kan si bu le nautatmi kan si bu zong ah ngeih mi daihnak asi. Harnak le sungh zatlaknak kan ton cuahmah lio caan, zawtfah le thihloh kan ton lio caan zong ah ngeih mi daihnak asi. Jesuh nih, "lungrethei le vansang au in um hlah u; nan thin zong phang hlah u" a kan ti. Hiti hei ruah ahcun thil si kholo a lo. Vawlei kan nunchung ah cun a ngah bak lo hme cu ti a fawi te. Sinain asi kholo ding cu Jesuh nih a kan chim bal lai lo. Asi kho ko. Amah Jesuh zong vawlei a leen lio ah harnak, zeirellonak le thangchiatnak phun kip aton bu ah cu daihnak cu a ngeih zungzalmi asi. Amah a cohlang i aa bochanmi hna nun kan zoh tik ah zeibantuk harnak le caanchia chung an um lio zong ah an i lawm, an i nuam i an hna a ngam ko. Cucu chunglei daihnak asi mi Jesuh daihnak an co cang caah asi. Jesuh nih a daihnak hi co ve hna seh ti a kan duh. Man loin a kan pek. Kan cohlan lai maw kan hlawt lai dah?