Dawt Rem Ṭha
22 Jan 2012
Salm 133
Unau rual i rem tein khuasak ṭi hi zeitluk indah a ṭhat i a nuamh! Aaron luthlung in a khabe ah, a khabe in a angki hngawng ah a vung luangmi oliv chiti bantuk asi. Hermon tlang dap, Zion tlang cung i a tlami bantuk asi. Zion tlang ah cun thluahchuahnak kan pek hna lai, tiah Bawipa nih bia a kan kam, zungzal nunnak cu.
Khoika hmun paoh ah, zeitik caan paoh ah dawt le rem hi a tha bik ko. Dawtnak le remnak a umnak ahcun zeizong vialte hi an ṭha dih, an tluang dih. I dawte le i rem te i khuasak cu a nuamh lawng si loin thluachuah tlamtling hmuhnak zong asi fawn. 'Chungkhar thurual tlu lo paamnak, khuakhat thurual tlu lo ṭionak' an ti bang chungkhar i remnak a umlo ahcun sifah le ṭumchuk lam panhnak asi. Hiti, i dawte le i remte khuasak a ṭhatnak kong hi kan bible caangthim nih phunhnih in a tahchunh.
Pakhatnak cu oliv chiti he a tahchunh. Oliv chiti hi hlanlio Israelmi nih an sunhsak tukmi asi. Sullam ngei le man ngei in an hman tawn. Tlangbawi, siangpahrang le hruaitu hna thim tik ah thimmi an sinak fehternak le nawlngeitu le tuanvo ngeitu an sinak nemhngehnak caah an rak hman. An luthlung in an kechik tiang luang in an rak toih hna. Minung thim menmen lawng silo in Pathian thimmi zong ansi tiah ruah ansi. Cucaah thimmi hna nih Pathian ṭihzah bute in rian an tuan ahcun khua-awng an tong i ramchung ah thluachuahnak a tlung. Pathian zeirel lo in an um ahcun Pathian sinin dantatnak an huah. Kan nih zong Pathian nih a kan thim i a fapa Jesuh thisen cu a kan toih cang. Thimmi kan sinak kan i cohlan i Pathian a dinnak le a pennak kan kawl hmasa ahcun kan herhmi vialte pek ding in bia a kan kamh. Thimmi kan sinak kan cohlan lo i kanmah duh in khua kan sak ahcun mualphonak nih a kan hngah ko. Pathian a ṭihzahmi hruaitu nih khua le ram le bu chung ah thluahchuah vanni a phurhtlunh i Pathian aa bochan lomi hruaitu nih ningzah hmaichiatnak a chuahpi tawn.
Oliv chiti hi damnak sii-ai zongah an hman tawn. Tuk-sah hma le ṭangfah tibantuk ah an rak i thlop nak ṭheu. Kan damlo ahcun zeihmanh a nuam lo. Ei kaa a thaw lo. Herha a zaang kho lo i mithmai a panh kho lo. Hawisin chuah zong kan huam lo. Pumh le khawmh zong kan huam lo. Kan zual deuh ahcun rian zong kan tuan kho lo. Cutikah, harsatnak le chamhbaunak dangdang aa chap chin lengmang. Kan ram a dam maw? Taksa in kan dam maw? Thinlung teh a dam maw? Thlarau in teh kan dam maw? Taksa, thinlung, thlarua in kan damnak ding ah Jesuh thisen in i thlop kan hau. Jesuh cu nunnak le damnak bawi asi.
Pahihnak cu Hermon tlang dap he a tahchunh. Hermon tlang hi tlang sangpi cu a si lem lo. Tlanghram hmun niamnak ah hin dum an tuah i thingthei kung a phunphun an cin. Hi thingthei kung pawl hi Hermon tlang dap nih a tlak hna i an hninghno peng. Thei tha tampi an tlai i minung caah ṭhathnemnak an chuahpi. Kan nih zong, Pathian dawtnak dapti nih a kan tlak ahcun mi nih din-ei awk ṭha dawtnak thei tampi kan tlai kho lai. Cutik ah mi an i lawm lai i Pathian sunparnak an hmuh lai. Kan nun a hninghno lai i lawmhnak muihmai a leeng lai. Jesuh aa tel lo ahcun kan nun a rocar tuk tawn i, kan tlai tawnmi thei zong midang caah a khami le a thurmi an si tawn.
Cun Hermon tlangpang ah a ummi tivarek tete caah dapti cu an tihna asi. Cu tivarek tete cu an hun i fon cio i tiva ngan pakhat ah a hun i chuah. Cucu Jordan tiva asi. Jordan tiva cu a kam i khua a sami vialte caah thluachuah phurtu tiva a si. Huatnak le ralnak nih mi a ṭhen tawn i khua le ram a hrawh. Remnak nih mi a fonh i khua le ram a ser. Kan lak ah remnak a um ahcun kan i fon kho lai i Jordan va bang kan luang ti kho lai. Cutikah midang caah thluachuah phurtu kan si kho ve lai. Khua le ram a ṭhangcho lai. Kan i lawm lai i kan i nuam lai.
Pathian thimmi kan sinak kan cohlan i a dawtnak dapti nih a kan tlak ahcun kan dam lai, kan i lawm lai i, remnak he tiva bang kan luang ṭi lai. Cutik ah; chungkhar ah siseh, khrihfabu ah siseh, khua le ram ah siseh, lei thluachuah he van thluachuah he a tlung lai i zungzal nunnak zong kan hmuh lai. I dawt le i rem hi a ṭha bik ko.
Hermon tlang dap
