Rosung Fale

13Jan2012

Fale hi Bawipa sinin kan hmuh mi ro an si., thluachuah a kan pekmi an si.(Salm 127:3)

Fa a hring lomi cu acingmi ti an si. Hlan Judahmi nih cun acingmi nu cu Pathian nih chiatserh mi a si ti tluk in an ruah. Cu bantuk nu cu mibu hmai ah an mithmai a bi. Nehsawh thlang lamh an tong. Ho hmanh nih zeite taktak ah rel an si lo. Sinain fa a hringmi nu, cu hmanh ah fapa a hringmi nu cu mi thluachuak ah hmuh an si. Lawmh le thangthat an co. A tawinak cun Judahmi nih hin fale hi Pathian thluachuah sungbik an si tiah an zumh.

Kan nih zong nih fale cu Pathian pekmi rosung an si tiah kan ti tawn ve. Sinain rosung bang in zohkhenh le kilven rian cu kan tlolh ngai tawn. Fale cung ah nu le pa nih tuanvo nganpi kan ngei. Cu tuanvo cu lak ngam, lak khawh le lak hrimhrim ding a si. Pipu, nu le pa sin in co mi rothil cu sunhsak khun a si. Tlawttlau lo tein kil ven a si. Ro le rah  sunhsak lo in a zuarthlaimi cu mi zeirualo ti an si tawn. Fale zong Pathian pekmi ro an si caah sunhsak ding an si. Kan fale an si aipat tiah neek ning an si lo. Hrin lawng a za lo. Thaithawh zanriah pek le thil puan zalh piak lawng in a za lo. An hmailei caah lam sialpiak an herh. Vawlei fimnak le thiamnak in than ter lawng zong in a za fawn lo. Nuncan ziaza dawh tein an than i Pathian sin an phak tiang cawnpiak le hruai ding kan rian a si. Cu fale zohkhenhnak kong ah Pathian kan i bochan ahcun Pathian nih a kan bawmh lai. Kan fale kong ah cun midang vialte nak in kanmah nih tuanvo kan ngeih bik. An tlawttlau sual ahcun Pathian nih sual a kan phawt lai. Khoi, fanu kan pekmi, fapa kan pekmi...? Ziah ka sin ah na phakpi lo?...a kan ti te lai.