Nuva Dawtnak 3

Dawtnak timi biafang hi Greek nih phun 3 in an fianh; agape dawtnak, philia dawtnak le eros dawtnak tiin. Agape dawtnak cu dawt aa hlawh lomi va dawt, a ka dawt ve lai timi le asin in ruahchanmi zeihman um bak lo in va dawt khi asi. Philia cu nu le va, u le nua, hawi le kom, chungkhat rualchan..kan i dawtnak phun hi asi. Dawt hlawh le duhnun peng a hau. Cu lawng ah sau a nguh. Eros tuhi cu thisa diriamhnak ca men i va duh le va dawt khi asi i kan thisa duhnak di a riamh ahcun, siloah a si khawh lo sual ahcun cu duhdawtnak cu a ziam ve ko. Nu le va dawtnak timi ahhin a cunglei pathum hi an i tel dih a herh.

Eros dawtnak hi zeirel loin um ding asi lo. Thisa in a nungmi kan si rih caah hrial awk a tha lo. Hihi nu le va pumkhat kan sinak langter tu bik zong asi. Pakhat le pakhat lungthin thiangte le ningzak lo tein kan duhnak i chimh i kan di i riamh ter a herh. I reem awk asi lo. Hi zawn ah kan di kan i riamh lo tuk ahcun i then(phohpian) a fawi ngaingai. Kan i ralrin a herh tuk. Nu le pa sinak(sexual) hi dawtnak le theihthiamnak a feh ter tu ngai asi. Amah belte hihi lawng hi nu le va kan kar lak i temtawntu hri asi sual ahcun tih a nung ngaingai ve. Dawtnak dang kan herh rih.

Philia hi eros nak cun a sang deuh. Sinain hi dawtnak hi a ziam kho zau ve.  Nonal lio bamtuk in kan muisam le kan tit-vun hna a hnihhno tilo hnu, ngeihmi chaw le va, inn le lo hna an lohtlau hnu, chinchap ah zawt chia fah hru hna vun ton, vanchiat ah pum tlinglo dirhmun hna vun phak sual tik ah lung a dong ruangmang tawn. An sin in zei ruahchannak hmanh kan ngei kho ti lo. Duh an nunnak an iang-ai zong a taang ti lo. Bochan awk zong an tlak ti lo. Lungput le ziaza lei in siseh, hmurka le biaholh lei in siseh, dawt i hlawh peng a hau. Cuzong kan tlinh khawh lo ahcun philia dawtnak hri cu a cat i mualpho in i then asi ko. Cucaah nutung patung kan si cang aipat tiin daithlan ding asi lo. Thianghlim tein um i zuam ding, i tamh le i mawih zong huam ding, lungthin, ziaza le hmurka zong in dawt hlawh le duhnun i zuam ding asi. Pakhat le pa khat i dawt tonh a hau.

Agape dawtnak hi a sangbik le a fek bik dawtnak asi. Pathian nih minung a kan dawtnak fianternak ah an chim lengmang mi asi. Kan i lehthah lio i mipi le Pathian hmai ah kan rak i kam mi dawtnak bia asi. Zeibantuk dirhmun kan phak  zong ah i dawt peng ding khi asi. A kan dawt lo zong ah dawt khawh, a vun a sawng dih le a hmai a kangh dih zong ah dawt thiamthiam, pum tling lo le thluak tlinglo in a um sual zong ah dawt chinchin, bochan awk a tlak lo zong ah dawt peng, a rian a tilh i lahkhah a ei lo zong ah, cun tangka a kawl hawl khawh ti lo zong ah dawt cikcek...hi pawl hi an si. Hi dawtnak hi minung sinak in a ngei kho zong an um phum men ko lai nain Pathian dawtnak fiang te in a hngal cangmi hna caah ngeih a fawi khunmi asi. Minung sinak lawng cun eros le philia helham hi an si deuh cio ko lai. Hihna pathum hi kan ngeih cu a herh dih ko nain agape dawtnak hi nu le va karlak ah a herh bikmi cu asi.