Nuva Dawtnak 2

18Jan2012

Dawtnak hi thlaikheu he ka tahchunh. Thlaikheu cu a nenno mi asi. Ruah cu a duh nain ruah faak a celh lo. A maal. Ni lum cu a duh nain nilinh faak a celh lo. A uai i a caar. Non a duh nain tamtuk pek cu a celh lo. A tlol. Rungrul ral ven piak a hau. Thladem zarh a hau. Ti hman te in toih a hau. Thlawh piak le sial piak a hau fawn. Satil arva kham kanh a hau rih. Hi vialte hi hman te le ningcang tein tuah piak hnu lawng ah a ṭhan a tha i theipar ṭha a chuak kho.

I ṭhit-umh ka kan i dawtnak hi a nenno tuk rih. Kan i co cang ko aipat tiah daithlan ding le zohsawh ding asi lo. A ral a tampi ve. Nu le va karlak ah ningzah pan tuk ding a si lo. "Kan dawt tuk" timi bia hi chim lengmang ding a si. Ningzah ding a si lo. Sinain i ham tuk(kawl i tavuantu an timi khi) ah cun a rawk kho. I ham tuk ahcun hawikawm ṭhing he i ton le bia i ruah dikdek ah lunghrinh le zumh lo phun i um a fawi.

Zia kan thuhmi a tampi. Kan sining le kan lungput dihlak kan i theih rih lo caah biachim holh rel le umtu hoiher ah kan i ralrin a hau. Kan i ṭhit-umh hlan i ngaknu dang, tlangval dang kan rak ngeih bal nak kong te hna chim lo ding asi. Chungkhat rualchan dang le ni- far pawl he zong pehtlaihnak ngei peng ah a ṭha. Pakhat le pakhat kan chamhbaunak kan i hmuh tik ah hlangfang tuk in i chimh rih lo ding asi.  Ih khun cung tu ah neem te in i chimh ah thil a tluang dih. Umkal nak ah i zulhkhalh khawh lengmang a ṭha.

Cuticun innchungkhar hmailei kong khuaruah tuaktan bu in dawtnak he kar kan hlan ahcun chungkhar a nuam lai. Pathian sin ah, " Bawipa, kan nu va tein kan i dawtnak le na hmai i bia kan i kammi vial te feh ter ko" tiin thla cam peng ding a si.