Nungna Ngaktah

Ngaktah ahhin nungna ngaktah le rohmi ngaktah tiin phunhnih in a um. Rohmi ngaktah cu nu kun, pa kun, siloah nu le pa nih thih takmi an si. Thih le loh cu kan duhmi le kan i hammi asi lo nain hrial awk thalo in kan ton lengmang. Ngaktah sicu a har i nun a chambau tuk hringhran. Fale an cutzat hnu le mahte kutke ngei kho an si hnu ahcun a zia a um deuh nain a cuza rih lomi fale tete vun roh cu mi lungthin a khoi khun. Ruahtam tuk an si. Fano hruai arpi, sahngar seh a ton i a fale tete an vaivuanh dih bang khin vaivuanh dih a si ve ko cang. Zeiti tha dah si, thih le loh cu kan hrial khawh fom lo cu teh aw. Hi bantuk rohmi ngaktah hi cu chungkhat rualchan dang le misiing pi tiang zong nih zaangfah le bawmhchanh an tong deuh tawn.

Nungna ngaktah timi cu nu le pa nun le dam ko tung i aa thenmi an fale khi an si. Kan dawt tukmi hna kan fale, ngaktah dirhmun i chiah hi kan ruah a rem awk hrimhrim asi lo. Hihi cu kanmah nu le pa cung ah a ngat bak ko. Kan fale dawtnak lungthin he kan hrial khawh ding a si ko. Kanmah pahnih karlak ah i theihthiamlonak, i dawt lonak le thinhun ngaihchiatnak a va um sual hmanh ah fale mithmai zoh in remnak le thatnak khua khan than ding asi. Kanmah zawn lawng ruat in kan i then ahcun kan fale kan dawt nak hna hi a tlingmi dawtnak a rak si lo tinak asi hnga. Nupi kan duh ti lo le va kan duh ti lo lawlaw ah cun aa ning deuh rih. Sinain nupi dang kan thi than thiamthiam, va dang kan ngei than thiamthiam fawn. Ka fale khi an ngaktah lawng a silo. Nu-ei le pa-ei tuar bu in, mi mithmai zoh in an nung i an caah a har tuk. Nu dang, pa dang sin ah nau thar kan hun ngeih cun thleidan nak a hung sang chinchin. Nungna ngaktah hi mi zaangfah an hruai tuk lo. Ziah tiahcun, an nu le an pa zia le lungput zoh ah ing a puang i an fale va zohpiak le va bawmhchanh zong tha a tho lo. Nu le pa an nun rih fawn ko caah rinh an si fawn. Cutik ah,fale lungput a hman kho ti lo. Tihnak le phannak in an khat. Hawi hngarnak lungthin an ngei. A thli tein thil tuah an hmang. Fir hna an hmang. Nu le pa cingcih lo le muangmuah lo fa hrrat cu hawi thluk khawh cu a si lo cu teh. Kan fale lungthin le ziaza a hrawk tu taktak cu kan mah kan si.