Nunchimh Thiam

14Jan2012 

Nu le pa hna, nan fale kha an thin hung seh tiin ti hna hlah u. Khrihfa ziaza le cawnpiaknak he tu than ter hna u.(Efesa 6:4;Kolose 3:21)

Fale hi sual hna seh, hrut hna seh, hrokhrol hna seh, fir hna seh...ti a duhmi le a cawnpiakmi nu le pa ahohmanh kan um lai lo. Fim hna seh, nawlngai hna seh, an ziaza tha seh, nu le pa upat hna seh...tiin thatnak lei lawng kan duh piak cio hna. Heh tiah kan cawn piak tawn hna. Sinain kan duh ning thengte in an tling kho lo. An tha kho lo. An fel kho lo. Hi tluk kan chimh hna le kan cawnpiak ko hna bu ah ziahdah zeihmanh an i hlei hnga lo tiah kan lung dongh caan a um.

A taktak ahcun kanmah nu le pa leikap chamhbau tu a rak si deuh. Cawnpiak zia kan thiam lo. An palh sual tik ah kan hro hna, kan raak hna. Kan velh hna. A zai in kan zai. Kan phunh kan riamh hna. Kan au kan khuang. Kan meet hna.  Inpa vialte theih awk in kan au. Holh chia le bia dawh lo kan chim. Cutik ah kan fale an lau, an ngong, an ningzak. Chimh nih a tei ti hna lo. A tih in an kan tih. Fale nih tih hi a tha lo. Kan sin le kan pawng an um ah an thin a phang peng. An za a long kho lo.  Kan hmuhhngan ah an i fel ter na in hmuh lonak ah cun an duh paoh in khua an sa.

Cun fale nih hin nu le pa cu an kan zumh tuk. An kan bochan fawn. Kan tuahmi thil paoh hi cawn awk tlak ah an ruah. Thiltha ah an ruah. Kan cawnpiakmi hna a dang, an hmaika ah kan tuahsermi a dang asi tik ah an fiang kho lo. Tuah hna hlah seh ti kan duhmi cu kan hrial hmasa awk a si.

Fale cu bia neem te in, dawtnak mithmai he cawnpiak ding an si. An palh sual zong ah ngaihthiam i hi hnu ah a palh tinak hngalo neem te in chimh ding an si. Kan kut thah diriamhnak ah hman bak lo ding. Bible relpi lengmang hna. Thlacam piak peng hna. Pathian nih an thinlung ah rian a tuan lai i nawlngaimi fale an si ko lai.