Nuva Dawtnak 1

15Jan2012

Ngaknu tlangval kan si lio ah kan i duh. Kan i uar. Aho vanngai loin kan leengti. Dawtnak bia phun zakip kan phai. Dawtnak bia ruam-aam asi mi paoh cu kan chim lomi a um lo.  Hohmanh nih chah khawh lo ding in tulhri bang a fekmi dawtnak hri in kan i ngerh dih. Vulei hi a rak nuam ve hrim mu kan ti. Kei ka nunak le ka vulei cu nangmah na si ko ee..ka ta aw, ka far aw..kan rak ti pah in cung thlapa le arfi tang ah kan hmur le kan hmur....

Len ti caan a hung sau. Runkhat semcawi ti ding in khua kan khan. Kap hnih nu le pa zong an lung tling. Khukthi raulhawi hna zong nih a co ding bak an si..an kan ti. Thin a tur pah ee...i ngaih tuk thin tur deuh khi. Puai nithla khiah asi cang. Puai tuah ningcang le program vial te zong an suai dih. Rev. aho nih dah, khoika biakinn ah dah?..lehthah ding tiang in khiah dih a si. Puaini a phan. Biakinn ah kan i lehtah. Pathian hmai le a pummi hmai ah dawtnak bia kan i kam than. Thihnak dah tilo hih cun then lo ding kan ti. Sifah zong ah, sithat zong ah i dawt ding kan ti. Zumhtlakmi na nupi, na va ka si lai kan ti. Thlacam nenh tein bia kan i kam. Lehthah tu nih "Nihin ni thawk in anih le anih cu pumkhat an si cang. Nu le va an si cang. Pathian nih a komhmi hna cu aho hmanh nih then hna hlah seh" tiah a vun thanh. Hiti hin chungkhar thar cu kan hun dirh.

Nu le pa hna, hnulei her in liam cia caan khi hei cuan hmanh. Chungkhar timi aa thawknak le aa semnak cu dawtnak asi. Pathian sin biakamnak in asi. Hihi kan philh lo awk a si.