Min Chawng Fadawt

18Jan2012

Kan chan ai lim riangmang, sem te kan cawi cang hnu cun,

Min chawng fadawt kan hrin semmawng nih,

Len min par bang dim ai hna.

Dawtnak in dirhmi chungkhar nih theipar a hun chuah cang.  Chungkhar milu a hung karh. Mi zeidah a si? Kan mah pahnih tuhmi dawtnak theipar asi. A min ah Min Chawng a si. Pathian pekmi rosung asi. Hlan ahcun kan min din tein kan i au tawn.  Kan hawile zong nih an kan auh. Atu cu min chawng fadawt nih kan min cu par bang a ṭawh cang. Min chawng nu le pa  ti in auh kan si cang. Fale min te i auh hi kan nih Laimi cu kan sunhsak tuk. Kan hna ah a thlum-al tuk. Kan nu le kan pa zong, mi nih cun min chawng pi le pu tiah an auh ve hna. Anmah ko an i lung hmuih khun. Ziah tiah, holhnak hmanh ah "tu thlum, fa al" ti pei a si cu.

Hi kan fa min chawng nih hin, cu hlan i kan rak i ngerhnak dawtnak ṭulhri kha nailon hri ah a hun kan thlen piak. Amah ah kan mit le kan lungthin aa tong zungzal. Kan hmailei ruahchannak vial te cu a cung ah kan chiah dih. Hawh le mi lawmh-saih a hun thiam le bang cun chungkhar a kan lawmh ter tuk. Um har kan thei ti lo. Caan tawite leng i va chuah duak hmanh kan huam set ti lo. Amah pakhat caah kan buai khim ve ko. Kanmah nu pa i zitmuai hmanh kan lung ah a um ti lo. Kum thum-li chung ah Pathian nih rosung fanu fapa dang a kan pek rih i, a tu cu chungkhar tling ngai kan si cang. Zei khuarin hngal lo in inn chung ah kan i tuai lulh ko cang.

Fale dawt timi ahcun fim le hruh, rum le sifah, der le thawn zeihmanh a seng lo.  Kan dawt ning hna a tluk cio ko. "Mah zohnak ah ṭha vang, mi zohnak ah chia kuk" tibang, mah fale cu kan mah mit ah an i dawh bik cio. Aho fale he hmanh thlen kan siang bal hna lai lo i, tangka zeizat hmanh zong in kan zuar siang bfawn hna lai lo. Kanmah thi le sa in aa semmi cu pei an si cu. Pathian pekmi rosung cu pei an si cu.

Hi tluk kan dawtmi hna kan fale caah tuanvo a ngei tu bik cu hringtu nu le pa kan si. Pathian dawtnak hngal bu in an ṭhan i, nu le pa nawl a ngaimi, a upat mi an si nak hnga, Pathian bia in chimh le cawnpiak an hau. Kanmah hrimhrim nih an zulh dingmi lam kan hmuhsak hna ding asi. An pial hnu ah kir ter ṭhan cu a fawi lai lo. Fapa tlau pa bang va tlau hnu ah, camping crusade in hrinṭhan i kir te ding khi kan i bochan ding asi lo. Atu te hin thok a herh cang.