Inn Thong Tlak
19Jan201
A ngaingai ti ah cun nu le va hi mi le mi pi kan rak si ko.Thi le sa in ti ah, cuti ngai in pehtlaihnak zeihmanh kan rak ngei lo. Sinain duhnak le dawtnak kan i ngeih veve caah kan hei i um i nu le va kan va si men i a si. Cu a kan ṭemṭawn tu dawtnak hri te um lo ahcun i ṭhen ding khi asi ko. Innchungkhar khat khuasak ṭung i kan i duh lo le kan i dawt lo ahcun inn thong tlak taktak khi asi ko. Kawl i "ingṭhawng ciah" anti mi khi asi taktak. Zingzan i sikṭhiat peng, mithmai ṭha i pek bal lo, pakhat le pakhat sualnak le palhnak rumro i hmuh, phun le zai aw lawng a len, cuti si cang ahcun inn chung um cu ho nih hme a huam ti hnga. A nuam lo tuk lawmmam hme cu. Per le choi, chuah le vahnak mit lawng au asi cio ko. Fanu le fapa zawn ruah lo le thlachiat vun ruah tunman lo ah cun, kan mak, ka kir ti a fawi te taktak.
Caan saupi kan i in hnu ah kan thlachiat ruah khawhnak nih a zo cawk lo i chungkhar ah buainak mei tlang a puak tawn. Bia lawng si ti lo in kut le ke he kan i zuanhnawh cang. Zei paoh va si cang ko seh, minung fa pei ka si ve cu, a celh in ka celh ti lo tiah innpa chakthlang le khuapi theih in kan buai i mual kan pho cikcek. Hi lio ah kan fale an mit au le an khuahrah a phin ning, an thin a phan ning le an lung a rawh ning cu a mak. Dai ko cang u ti hmanh an kan ti ngam lo. A firtu ningzak hlah, a hmutu ningzak ti bang kan fale tu ningzah le mi hmai khap lo in an um. Innpa, Pastorte le upa lungfim nih tlang an kan tlak hnu ceu ah kan va dai i remnak kan ser. Asi nain ni hnih-thum chung cu kan i unh, kan i ngioh. Kan i chawn lo. A hrial in kan i hrial. A bawh in kan i bawh.
Hiti bu hin cun zungzal hmunkhat khusak cu asi kho bal lai lo, kan i ṭhen ah a ṭha ko lai tiah khua kan ruat. Vun i ṭhen ngaingai ah le..kan fale zeitin dah an um lai? ..timi vun ruah tik ah asi kho ṭhan hoi lo. Cuticun, kan i dawt lo bu, kan i zumh lo bu, zingzan kan i siik bu, mithmaitha kan i pek lo bu, le hmunkhat zong ah ih ṭi huaha lo bu in innchungkhar ah cun khua kan sa. A nuamh lo ning cu chippit khi asi. Hi ciammam hi pei inn thong tlak cu asi cu. Zeitik ah dik kan luat khawh te hnga????????
