Innchungkhar

16/01/2012 12:06

 

Nu te chuak kaw pa te ca, pa te chuak kaw nu te ca...an ti bang kum le khua nih a phak cun muichia habeuh tete zong nupi le va cu ton cio a si. Mah tawklo in tum a sang tukmi bel an ton a tlai deuh. Vanchia cu a hlei thai zong an um ve. Nuva thar inn dang an hun chuah cun innchungkhar dang an si cang. Fanu le fapa tete an hun hrin hna i terual chungkhar an hung si. Terualh le cetco lio ah cun nu le pa cu an khing a rit khun. A ruang cu fale an cutzat deuh hlan, nu le pa rian bawm kho an si hlan a si caah nu le pa cu rilchuak beng lo le lusam hngal lo in an um lio a si. Fale an hun tlah cun an khing a zaang deuh cang. Kan nih Laimi lebang cu fa tampi kan hring pin ah pi le pu, fapa le nupi le an fale rual he inn khat ah caan saupi khusak kan hmang i civui tuah khing kan si peng ti awk a si.

Innchungkhar khat ah; nu le pa, fanu le fa pa, tule rual ,pi le pu le umpi tu dangdang ti in khuasak asi. Nu le pa cu chungkhar ah tuanvo ngeitu bik an si. Cuhmanh ah kanmah Laimi sining cun pale ko hi tuanvo an ngei khun. Nu le pa nih hin ni fatin thaithawh zanriah kong ah siseh, hnipuan fenh-aih kong ah siseh, zawtfah damlo kong ah siseh, fale fim cawnnak kong ah siseh,  innchung thil le ri, ihphah puan vurh, um le kheng, inn le lo, dum le hau, satil arva...an tuaktan dingmi a tam tuk. Pawcawmnak ah phiarhlam chom hna a vun hauh, vokte arte zuarthlai awk zong ngeih lo, tangka luhnak dangdang zong vun ngeih lo ahcun nu le pa cu an sii a vaang ko.

Pi le pu an liam. Fale pawl an tlat. Nupi an thi, va an ngei. Inn dang an chuak i chungkhar thar an ser cio. A cheu cu kuli tuan tangka kawl ah ramchung, ramleeng ah an perchoi. Lai hlum le inn hngak cu a tar cangmi nu le pa lawng an si ko cang. Caan khat lio ah khuarin hngal lo in thawng le pang he a khatmi innchungkhar cu thereng chai cheih bang thawng pang a dai dup ko cang. Chuakti u la nau rual zong hmundang le ram kip khuasak asi tik ah mui hmuh chim lo phone i chonh hmanh a har cang.

Nu le pa le unau rual he hmun khat khuasak ti caan hi a tawi hringhran. Hi caan te lawng hi lungtling diriam tein kan i dawt khawh caan asi. A langhlat in kan i daw ko kan ti mi hi cu lung a hmui kho lo. Di a riam kho lo. Khirh than awk tha sehlaw cu kan chungkhar tlingte in khua kan sak ti lio caan ah khan ka hei khirh hnga ka ti.

 

—————

Back

Innchungkhar

Nu te chuak kaw pa te ca, pa te chuak kaw nu te ca...an ti bang kum le khua nih a phak cun muichia habeuh tete zong nupi le va cu ton cio a si. Mah tawklo in tum a sang tukmi bel an ton a tlai deuh. Vanchia cu a hlei thai zong an um ve. Nuva thar inn dang an hun chuah cun innchungkhar dang an si cang. Fanu le fapa tete an hun hrin hna i terual chungkhar an hung si. Terualh le cetco lio ah cun nu le pa cu an khing a rit khun. A ruang cu fale an cutzat deuh hlan, nu le pa rian bawm kho an si hlan a si caah nu le pa cu rilchuak beng lo le lusam hngal lo in an um lio a si. Fale an hun tlah cun an khing a zaang deuh cang. Kan nih Laimi lebang cu fa tampi kan hring pin ah pi le pu, fapa le nupi le an fale rual he inn khat ah caan saupi khusak kan hmang i civui tuah khing kan si peng ti awk a si.

Innchungkhar khat ah; nu le pa, fanu le fa pa, tule rual ,pi le pu le umpi tu dangdang ti in khuasak asi. Nu le pa cu chungkhar ah tuanvo ngeitu bik an si. Cuhmanh ah kanmah Laimi sining cun pale ko hi tuanvo an ngei khun. Nu le pa nih hin ni fatin thaithawh zanriah kong ah siseh, hnipuan fenh-aih kong ah siseh, zawtfah damlo kong ah siseh, fale fim cawnnak kong ah siseh,  innchung thil le ri, ihphah puan vurh, um le kheng, inn le lo, dum le hau, satil arva...an tuaktan dingmi a tam tuk. Pawcawmnak ah phiarhlam chom hna a vun hauh, vokte arte zuarthlai awk zong ngeih lo, tangka luhnak dangdang zong vun ngeih lo ahcun nu le pa cu an sii a vaang ko.

Pi le pu an liam. Fale pawl an tlat. Nupi an thi, va an ngei. Inn dang an chuak i chungkhar thar an ser cio. A cheu cu kuli tuan tangka kawl ah ramchung, ramleeng ah an perchoi. Lai hlum le inn hngak cu a tar cangmi nu le pa lawng an si ko cang. Caan khat lio ah khuarin hngal lo in thawng le pang he a khatmi innchungkhar cu thereng chai cheih bang thawng pang a dai dup ko cang. Chuakti u la nau rual zong hmundang le ram kip khuasak asi tik ah mui hmuh chim lo phone i chonh hmanh a har cang.

Nu le pa le unau rual he hmun khat khuasak ti caan hi a tawi hringhran. Hi caan te lawng hi lungtling diriam tein kan i dawt khawh caan asi. A langhlat in kan i daw ko kan ti mi hi cu lung a hmui kho lo. Di a riam kho lo. Khirh than awk tha sehlaw cu kan chungkhar tlingte in khua kan sak ti lio caan ah khan ka hei khirh hnga ka ti.