Pipu Rosung

Kan pipu hna hi chanthar tahfung in kan tah hna ahcun an hrut tuk ti khawh an si taktak ko. Sinain anmah an chan le an caan sining le khuaruah ning in kan tah hna ah cun an fim tuk lehpek. Kanmah nak in a let in an rak fim.

Mi tampi nih pipu hna cu an hrut tuk e, thilpuan hruk aih hmanh an thiam lo e, ca an thiam lo e, saram bantuk in an tlong e, an rak i do, an rak i that e...cutin an rak um e, khatin an rak si e tiin an chiatnak kong kan chim tuk tawn. An chan lio thil umtu ning in tuak ah cun thangthar kanmah nak in an fim deuh, an thiam deuh, phun le ram an daw deuh, an ral zong a tha deuh, ti khawh asi. Pipu hna nih hin a man khiah khawh lomi rosung an kan roh mi tampi a um. Miphun tling pakhat sinak tahfung ah ram le nunphung, ca le holh hi an biapi bik.

1. Ram le Vawlei

Ram le vawlei an kan roh. Sa le ral lak ah an nunnak an i ven bu in fingkip le tlangkip an hrawn i, tu le hmawng an thiam i khua le ram an rak ser. Cu an sermi khua le ram cu an rak humhaak. Raltha in an rak ven. An ram himnak ca le an nupi an fale himnak caah ral an rak do. Phu zong an rak i hlam tawn.Tuchan ah kan hngahmi Lairam hi pipu ro asi. Hi an ro hi vaivuanh lo le hrawh lo ding asi. Ven ding le sersiam ding ah rian kan ngei.  Lairam cu tlang a sang tuk, horkuang a thuk tuk, hmun rawn a um lo, lungpang le chengpang lawngte asi, ramsa tlonnak lawng ah a tha,...tiin sawi ding asi lo. Pipu hna chan ah hi ram tein an rak i cawm kho tuk ko. Kanmah zong, hi ramte nih hin a kan cawm khawh tuk ve. Nunnak ah a herhmi cu tlamtling te in a ken dih ve ko. A hngaktu minung san kan tleih le tleih lo lawnglawng asi. Ram kan dawt ahcun ram nih a kan cawm lai.

2. Biaholh le Hla

Bia thatha, holh dawhdawh le hla phunphun an kan roh. Pipu hna cu cacawn cu chim lo cawn dingmi ca hmanh an rak ngei lo. Laica uico nih a ei ti an chim cu kan theih tawn nain zeitik caan asi cu theih khawh asi lo. Hi zawn ahhin ca an thiam lo ruang ah an hrut ti khawh an si lo. Tuchan cathiam pipi zong a hrut mi an um len ko. Pipu hna hi biaholh le hla ah an rak rum taktak. Phungthluk bia tampi an ngei. An nun nih a tonmi chung in phung an rak thluk. Mirangte, Tuluk te an phungthluk nak hmanh in an tha deuh, kanmah Laimi ca koko ahcun. Hla aw tampi an rak ngei. Hla phan an rak thiam dih ti awk asi. Ngaknu tlangval an i len le an i helh zong ah hla(biazai) lawngte in an rak i leh. An tuahmi paoh hi hla ah an canter khawh dih. Hlabia le hla aw i ruahta len lo in an phuah i an sak khawh colh ko. Tuchan ah mifim cathiam, catang sangsang kan um cang kan ti nain chimrel a tlakmi phungthluk bia pakhat hmanh kan chuahpi kho lo. Miphundang phungthluk saupipi tu cu heh kan i chim sek. Pipu hna phungthluk tucu kan thiam lo. An sullam zong kan hngal kho lo. Cun, solfa, tanbo, tingtang tum lei ah thiamsang kan tampi na in hla phan thiammi kan tlawm tuk. Pipu rohmi biaholh le hla hna cu kan i zahpi i midang holh le ca le hla tu kan uar deuh. Hihi chanthar uico kan si.

3. Nunphung

Nunphung timi biafang hi a huap a kau tuk nain bite in ka hun langter ko lai. Miphun kip nih nunphung an ngei dih. Nun ning, khuasak tuntuk ning, umtu hoiher, thilthuam, biachim le holhrel ning, hlawnthil le laam, din le ei, zatlang nun vialte a huap dih. Pipu hna nunphung hi a tling tuk. Anmah chan caah cun an rak tha tuk, an rak i dawh tuk fawn. Nunphung ning tein an rak nung. Nunphung ning lo in nun cu an rak i nautat. An ning a zak.  Pipu nih an kan rohmi nunphung hna hi anmah chan i an rak tuahning theng te in dir pi awk ahcun chantar minung kan caah aa tlak tilo mi, a herh lomi le a tha lo mi tete zong a um len ko lai. Hlawt silo in kanmah nih chan he aa tlak in remh, thlen le cawisan ding tu an si. Pipu hna nih lungput ziaza lei ah an ngeihmi nunphung hi Khrihfa phung, cu hmanh ah Jesuh cawnpaiknak he aa naih hringhran. Khoika hmun paoh le zeitik caan paoh ah kan nunphung cu kan dirpi awk asi. Hmaihngalpi awk tlak in kan tamh ding le kan cawisan ding asi. Mah mipnun le nunphung tanh hi miphun dang le an nunphung va huat le va doh asi lo. Hihi kan i ralrin awk asi.