Pipu Nundawh
Pipu hna hi an chan sining nih a ngeih caah lenglei hmuhnak ahcun fihnun, tihnun le hruh an hlawh taktak ko lai. Nain an nun muru taktak cu lungvar bantuk asi. Aa dawh i duh a nung tuk. Iang a ngei tuk. Tuchan mi he cun kan i lingtalet. Tuchan ahcun lenglei in kan thiang, duh kan nung, kan fim nain chunglei in fih kan nung, tih kan nung, i kan hrut. Pipu hna kha chungnal leng thu ansi i kan nih hi chungthu lengnal kan si kan ti khawh.
An nundawh tampi lak ah ka uar khunmi hna cu:
1. Thlachiatruah nun an ngei
Hi kong hi hmun dang ah tam deuh in ka tial than te lai. A tawinak i chim ahcun thlachiatruah timi nih hin Bible chung i kan hmuhmi Thiangthlarau theitlai vialte le Jesuh cawnpiaknak tampi a huap. Thlachiaruah ticu, mah nih si le co duh cukmak komi zong midang tu si ko ne hna seh, anmah tu nih co ko ne hna seh ti khawh khi asi. Huam lo tukmi le duh lo tuk mi zong vun i hneek chih tualmal khi asi. Thin a hun tuk i mei kangh in a kangh bu zong ah...e..zei ti tha...tiah let lo in vun i suum khawh khi asi. Sian lo bu te zong ah thenh le pek khawh khi asi. An i hlawh lo bu te zong ah hei dawt khawh khi asi. Tahchunhnak: Hlan lio ah thih loh an ton tik ah mui le zan a si zong ah zanhlan in khuachingchan ah zual kawh asi. Cuti zualko fialmi cu a dam set lo zong ah, aning a tih i a ngamh lo tuk zong ah thlachiat a ruat, pacan a cuh i a rak kal ko. Pasal, nusal timi bia hi bia sawhsawh ah an chim lo.
2. Zumhtlak nun an ngei
Pipu chan ah cun innka tawh an ngei lo. Mi nih kan thil an fir lai ti hi an phang bal lo. An thil mansung vialte cu bukbau in innleng ah an chiah. Thithringchaw asimi darkhuang, hmaihum, sumsel, bongbong, chengcheng vial te pin ah fa-buk zong innleng lawng te ah chiah dih a si. Meithal zong innleng kaanphir cung ah an khan ko. Ramleng an chuah tik ah innkang meitet um sual seh law tiah an bukbau cu dumchung banhla phur ah an chiah ta tawn. An thilri a tlau ballo. A him zungzal ko. An lungthin hi tuchan aamahkhan tawhnak in a fek deuh.
Pipu chan ah fir a um hrimhrim lo ti cu asi lem lo. An phungthluk bia ah: Fir thangchia, hal thangtha; Uifir phuhrun in; A firtu ningzak hlah, a hmutu ningzak...timi tete an ngeih caah fir cu a rak um ve ko ti khawh asi. Sinain zilpum maipum, thei le hai, locul bonbok hmaihrem...ti tuktak khi firthil an si deuh. Fir a hmang mi cu..a zopang, a kutke a sau..an ti hna. Khuapi theih in an mual phoh an si. An chungkhar in mifir chung an ti hna i an fale zong a chanchan in mifir fa tiah zohchih an tong thai. Cucaah fir fir khat nih fir zakuai an ti phah. Fir lo mi fir puh cu an i fahsak tuk ve.
3. Dinfel nun an ngei
Hlen le lihchim hi a chia tluk ah an ruah. An chimmi cu lungum bia lawng asi. An zertiang lo fawn lo. Nahchuah le nekneih zong an duh lo. Mi nih thatnak le chiatnak a ton ahcun lungthin tak in an lawmh hna i an ngaihchiatpi hna. Zei an tuah paoh ah an i biatak. I ziaphel ti a um lo. Mi rian, mah rian le tlangrian timi an dang lo. Anmah le an tha ning tein an tuan ko. Eihmuar an hmang lo.
4. Dawtnak le zaangfah nun an ngei
An i daw. An i siaherh, An zawn an i ruat. An i zaangfah. Cu lungthin cun an i bawm, an i then, an i pe. A ngei deuh nih a ngei lo kha an coih hna. Vok le ar tiang in an i cawi ko. Zupu zong an i cawi ko. A karh le a miak an i la bal lo. A thawng deuh nih a der deuh kha an cehken hna. An hnong hna lo. Thar an i cangh, sazaam an i hleh. Nuhmei pahmei zong tha tein an zohkhenh hna.
