Nu le Pa Upat 1

01Feb2012

Nan nu le nan pa kha upat hna u ti cu nawlbia pahra chung ah a ummi asi(Exodua 20:12). Fale caah kan zulh hrimhrim ding asi. Nu le pa upat cu thluachuah nih a zulh. Zeiruang ahdah kan upat hna lai? Zeitin dah kan upat hna lai? Upat awktlak in an um lo ah teh kan upat thiamthiam hna lai maw? Nu le pa upat ruang ah zei thluachuah dah kan hmuh lai?

Nu le pa cu a kan hringtu an si ruang ah upat ding an si. Anmah thawng in minung ah kan sem i nungdam te in kan chuak kho. Fawi tehlek in an kan hring lo. Harnak le nganfah tampi tuar hnu ah an kan hrin. Kan nule nih an kan pawi chung vialte zei tluk in dah an re a theih ti kha ruat hmanh? Hrin kan si lio ah zeitluk in dah nganfah an tuar ti kha ruat hmanh?

Kanmah ruang ah a duhmi aa suum i a duh lomi aa hnek chih. Kanmah ruang ah thlano a thei i a luak he aa ciah. A duh bal lomi kuakdap le lungmot vialte a baar dih. A duh tuk tawnmi zong a fih i a rim theih hmanh a duh hoi lo.An paw vei tia he a cawlcaang i a herh mi paoh tlolh lo in a tuan rih. Kan ke in a paw cu heh tiah kan lamh i a mitkuh thawt lio hna ah kan thangh khah. Kan um ning a hman le hman lo chek ah MCH ah an kan kal pi. Kan fate hi nungdam in a chuak lo sual hnga maw, pumtling lo hna in a chuak sual hnga maw...tiah an lungre a thei peng. Hrin kan si hlan in a herhmi vialte an damh dih. Hrin kan si ni ah zeitluk in dah nganfah kan pek hna....? Na/ka nu kha a thih lo lawng asi khah. Thlan tlang ah a dir ko cang. A tha um-ek in aa sen nak ah a thlan nih a ciah. Kan chuah nak ah zeitluk in dah kan hei pamhhmeih rih mu. Pheizim langh hmanh a duh bal lomi nih kanmah chuahnak caah cun zei langh hmanh poi a ti lo. Hi lio caan ah hringtu pa zong uite ek chuak an lo ve.  An thin a phang tuk. Nu-fa hna dam in an i then lo sual lai, mual kan pho sual lai....a phunphun an ruahnak ah chonh hmanh a thei lo. Nu le pa an i lawmh le an i nuamh bik lio caan cu nangmah le keimah nungdam te le pum tling tein kan hung chuah lio khi asi. Cu tluk har cun an kan hrin caah hringtu an si ruang hrimhrim ah hin upat awk an tlak. Kan nih cu an thi le an sa he, an nunnak le an dawtnak he an kan hrin chihmi kan si.

Cu lawng hlah e, hrin kan si ni in nihin tiang a kan dawtu le a kan cawmkeng tu an si.