Nu le Pa Chantawi tertu Fale

17Jan2012

Nu le pa nih fale cung i an ngeihmi dawtnak hi zei tluk ngan dah a si ti hi theih a har ngai. Ngakchiat lio, nungak tlangval si lio ah theih a har chinchin. Mah nih fa hun ngeih hnu ah tlawmpal te theih deuh a si. An kan dawtnak hi Pathian dawtnak changtu dawtnak asi. Cu dawtnak ruang ah fale caah cun harnak phunkip an tuar huam. Ningzah phun kip zong an ton ngam. Thih hmanh an ngamh  ko. Fale zawnruah ah ei thaw vialte an i suum, vitamin zong bau viar in. Thilpuan tha an i suum. Ei thaw le thil puan tha hi an duh ve ko. An i suum bia tu a si.

Cu dawtnak cu fale cheukhat nih kan thei kho lo. Zeiah kan rel tawn lo. Kan hro hna. Kan tlerhkhonh hna. Kan hlen hna. Mihrut zei thei lo kan ti hna. Kan zahpi hna. Zu i rit riangmang in kan buai hnawh hna. Innchung thilri kan den dih. Thil kan pawn. Cutikah an lau, an ngaihchia. An kan tih. An thinphang. Lung zawtnak an ngei phah. An mitkuh a vuai kho ti lo. An eika a thaw ti lo. An der ching lengmang. An reu chin lengmag. An chan a tawi. Thih zat hlan ah an kan thih tak.  Nu le pa thattu le chantawiter tu cu kanmah kan si ziar.