Timit Vakuang
17Jan2012
Timit khuahrawn
Thingparsang aw: Khua pau e, lainak vandum kil lang,
Ngaknu leeng he ri duaimai in,
Thing taal rang sah kal cu hoi lai e.
Hakha, Thantlang ummi a tam u nih cun Timit va cu kan theih ngawt lai dah. A tiva kuang cu hme hmanh sehlaw hla cuang minthang tiva pakhat a si ve. Zinghmuh tlang hram in aa sem i Bawinu va ah a va fon mi a si. A hme ko nain zeiruang ahdah hla cuang le chimphai dai lo asi hnga ti hi ruah phu te a si.
Timit vakuang hrawn ah hin far thing tampi an kho i, inn saknak ah kan hman. Inn-lo rianhnak ah a kan ṭhathnem hringhran. Cun, nel rawn ṭha tete zong a ser caah chungkhar tampi kan paw a kan cawmtu zong a si fawn. Rawl lawng si lo in meh zong asi chih. Vitamin a ṭha tukmi ngasa, cang-ai, kingkuar le ti-uh tehna pin ah tisik an-hnah zong a kan rin.
Hi pin ah, pipu chan in nihin kan chan tiang lungnuamhnak a kan pe tu a si. Lai lei ngaknu tlangval kan i nuamh bik nak cu tlangkai le ngahring dawi hi a si. Ram dang bang biscope va zoh awk le nuamhnak dangdang va tuah awk kan ngeih lo ca zong ah a rak si men ko lai. Sinain hi hna hi um hmanh hna sehlaw ngahring dawi le tlangkai cu an laan kho lai ka zum lo. Zeicahtiah Laimi nih kan nunphung bantuk in kan i ruah cang. Kawl ralkap pen hnu cun Rungtlang belte tlerhtlawh ngam a si ti lo. Cucaah khua a hung pau cun Timit lei lawng te panh a si cang. Hawikom rual, zung rianṭuan ṭi hawi, chungkhar, BYF, sunday school, sianginn class, sang le veng, peng le tlang...tiin a phuphu in Timit ah choi dih a si. Zarhte ni le zungkhar ni ko ah kan zual. Tiva kuang kan khat ko hme cu. Lung va phawh i nga va tlaih theng khi kal hnawhmi a si lo. Nuamh bak a si ko. Inn i kan lungretheihnak vialte le kan thilrit vialte kan va bungh dih. Ummmm!!!!!!!A rak nuam ve hrim ko.
Timit va hi kan dawt ding asi. Kan caah tiva nung asi. Lawmhnak bia va chim zong ah a thei lai lo. A kan ṭhathnemnak hi kan theih a herh. Amithmai kan zoh ve a herh. Kan zohkhenh le kan kil ven a herh. Cuti kan dawt ahcun hmailei chan ah atu a kan ṭhathnem mi nak let tampi in a kan ṭhathnem rih lai.
Timit va nih a kan cawnpiak ve. Mi dang caah ṭhahnem santlai le nuamhnak le lawmhnak phurtu si ding. Rawlṭam mi khim tertu le tihal mi an tihal riamh tertu si ding.
