Chungkhar Koktlong

 22Jan2012 

Kongtlong le boro hi chimkeem bia phun an si. Ka lung cun a fiang ngai nain a zeiti set in vun fianter awk ka thiam ve hlei lo. Tahchunhnak ah: Kan nu nih zanriah a ser. Kan nupa farual in cabuai kan dum. Buh kheng, tihang kheng le meh ah antlak bak lawng cabuai ah a hung. Antlak hmanh cu chihmui phulh lo pi khin. Ceṭani zong um hlah, thakbare pum zong um hlah, hringṭam phun zeihmanh zong um hlah. Cutikah kei nih, 'tuzan lei kan rawl cu a koktlong tuk' ka ti. Thal cingling ah cun Thantlang market ah tisik anhnah a har tuk. Kan hawt ngai zong ah cawk awk a um tawn lo. Kan boro taktak khi asi.

Mi pumpak hrimhrim in mi koktlong cu kan um rengreng. Chungkhar zong ah a koktlongmi chungkhar kan um. Koktlong hi zia pakhat asi ve. Mi cheu khat nih cun a koktlongmi hi uah le faih, mi zeirel lo, lungngan le mi suauphau lo ah an kan rel tawn. Cucu a rak si lem lo. Kanmah zia ngeih a rak si ve ko. Kan lung cu a thiang tuk ve ko. Holh tamtuk le i thelh tuk nak cun holh lo in daite um ziar zong cu a ṭha deuh tawn ve. Sinain koktlong tuk cu a tha lo. Minung hawi sin ah a tlonglengmi kan si caah a ziazawn zoh thiam le hawisin ah tlumtlak khawh ve a hau. Mi koktlong cu hawi sin ah kan tlumtla kho tuk lo. Kan koktlong ruang ah hin kan sunghmi tampi a um tawn.

Mikoktlong kan sining tlawmpal in ka hun langhter hmanh lai:

-Midang sin in thil ṭha hmuh le bia ṭha kan theih tik ah ka lawm ti chim kan hmang tuk lo. Kan chim hmanh ah kan dangpar te in kan chim. Mi va lawmh-seih kan thiam lo.

-Hawi he i ton tik ah va chonh biak hmasa le kut chanh hmasa kan hmang lo. Anmah an kan chonhmi le an kan halmi hmanh an bia rul fang lawng kan leh hna. I ṭhen tik zong ah dam te in hei ti, mangtha hei ti, kan i tong ṭhan te lai hei ti, chim kan hmang lo. Hawikom cung ah kan koktlong.

-Khualtlung mileng ngeih tik ah zeimaw supsap tete hei dangh le meh thaw rawl thaw deuh zalh piak hlei zong kan hmang lo. Thawngpang va hal le bianuam va ruah zong kan hmang lo. Lungthiang ngai in, "mah inn um in um cio ding asi ko cuh" kan ti huar. Khualtlung mileng cung ah kan koktlong.

-Chungkhar minung pakhatkhat maw, kan rualchan le kan innpa pakhatkhat maw, kual an tlawn lai le an hung tlun tik ah thiltimh piak, va thlah, va don, kut tlaih le chonhbiak phunphai kan hmang lo. Kan ning hna a zak.

-Innlak lennak maw, pumhnak ah maw, nu le va i zulh khalh le va ṭhutṭi kan hmang lo. Inn zong ah i zitmuai thulhthalh kan hmang lo. Nupi le va cung ah kan koktlong.

-Nupi maw, va maw, fale maw, chuahni camtuak tuahpiak le laksawng pek zong kan hmang bal lo. A herh lo cuh kan ti men. Fale nih thilṭha an chuahpi tik ah lawmh le chimthiam kan hmang setsai lo nain an palhnak tu ah cun hro le raak le velh hi ṭhawn ah kan ruah. Innpa theih i au zong kan ning a zak lo. Fale cung, nupi cung, vale cung ah kan koktlong.

-Mi zawfaak kan ngeih tik ah thazang peknak bia chim, an duh herh le an hawt-hai mi zalh piak kan hmang lo. Mi zaw cung ah kan koktlong.

-Hawikom maw, chungkhat rualchan maw, nausem ngei an um tik ah va zoh le va lawmh kan hmang lo.

Mi koktlong mi hi kan koktlong bantuk in, minih zei ti pi an kan chonhkhenh lo le an kan suauphau lo zong ah mi va uhṭanh kan hmang lo. Thin hun le ngaihchiat zong a um hlei lo. A koktlongmi fale cu an koktlong deuh ve ko. A hmun le a caan zoh thiam in kan hmurka kan i sian deuh le hawidang he i pehtlahnak zia dawh kan cawn deuh cu a hau ko. Thli ṭhat tuk khi chim duhmi asi lo. A leer lamh cu tlaknak a si ve.