Chungkhar Pumh

16Jan2012

Khrihfa innchungkhar nih cun chungkhar pumhnak hi tuah hrimhrim ding asi. Fale cawnpiaknak ah caan tha bik a si. Pumh ti tik ah bupi pumh bantuk theng khi chim duhmi a si lo. Bible rel ti nak te le thlacam ti nak te ngeih vial zong a za tuk ko. Cun lung um bia tete i ruah le chun i kan ton ciomi kong tete i chimh cio zong ah a tha fawn. Hihi fale nih Pathian bia in an thannak ding ah le thlacam nun an ngeih nak ding ah bawmtu tha bik a si. Pathian dawtnak kong le thatnak kong, a kan zohkhenhnak kong vialte chimh lengmang ding an si. Cun Pathian sinah lawmnhnak biachim an hman ding zong cawnpiak ding an si. Minung hawi he i pehtlaihnak ah a herhmi nuncan ziaza le lungput, zulh ding phung le lam le hrial ding thil tete zong hi caan i i chimh ah a tha bik.

Chungkhar pumhnak ngeih khawh hi lung nih cun a duh cio ko. Vun thawk taktak a har ngai. A thawk cu kan thawk khawh tawn ko. Nain peh zulh khawh a har. I hneek chih a hau. A hnu deuh cun zia bantuk ah i ngeih a si.  A caan khiah te in tuah ah a tha. Tahchunhnak ah zan nazi 7,8,9 ti bantuk in. Caan saupi lak a hau lem lo. Bia saupi chim zong a hau lo. Ngakchia nih cun sautuk caan hman cu an duh lo. Hi caan lio ah mileng kan ngeih zong ah tuahpi ding an si ko. Mi leeng kan ngei le tuzan cu tuah lo in um ko sih ti ding asi lo. Tuahpi ding an si. An caah thiltha tu asi. An i cawn ve lehlam lai. Chungkhar ah Pathian bia le hla he i ciah deuh hrat le thla tam deuh cam hrat ah cun lungthin a dai i hna a ngam deuh ngaingai. Thinhun caan le ngaihchiat caan a chuah sual hmanh ah Pathian bia nih a hmih khawh zau. Pathian he hawikomhnak tam deuh a ngei khomi chungkhar ahcun dawtnak le remnak, daihnak le hnangamnak a leeng deuh zungzal.

Caan hman ning tahchunhnak:

@ Chungkhar pumh hruaitu.............Pa, ..Nu..Upa pakhatkhat

@ Terual deuh si ahcun hla zong sak ah a tha(ngakchia nih an thiam vemi thim ding)

@ Bible rel ding(sau nawn in rel ding)...Hruaitu nih rel i mi dang nih a hnu zul in rel ve

@ Bible cang nih acawnpiak duhmi a tawinak in fian ter ding(minute 5 hrawng)

@ Chun kan hmuhtonmi chim cio ding(thlacam ding tete zong chim chih ding a si ko)

@ Hmunkhat te ah aw chuak in thlacam ding

@ Bawipa thlacamnak i hrawm ti i dongh ter ding

@ Kut i tlaih cio hnu ah mah duh herh tuah cio khawh a si cang

Hiti phun deuh hin zan fatin kan hman khawh lo hmanh ah zarhkhat ah voi hnih maw voi thum tal maw hman i, zan dang paoh cu hmunkhat thlacamnak te lawng zong in hman ding a si ko.