Chungkhar Buainak

21Jan2012

Chungkhar kan i nuamh le kan i lawmh deuhdeuh ahhin Sehtan cu a tha a chia chin. Kan buai le kan i nuamhlo nak ding ah a phunphun in aa zuam. Buainak rungrul(virus) chungkhar ah a thli te in a thlah. Buainak rungrul hi mit hmuh le kut tongh khawh awk in a ngan lo. A hme te. Daithlan ahcun a ṭhang, a karh i kham khawh asi ti lo. Kan keza ah hling hmete nih a kan chunh tikah, coih lo le zeirel lo in kan um ahcun a hnu ah lungdo hma nganpi ah aa chuah khawh bantuk khi asi.

Chungkhar kan buai tawnmi, kan i cuh le kan i el tawnmi tete khi ruat hmanh. Kan i siik le kan i ṭhen phah tawnnak zong khi a hram hei zawt hmanh. Thil pipa an si lem lo. Thihkung lohkung thil kong ah an si lo. Thil hmete in a thawk tawn ko. Bia kaa hnih khat ruang hna ah kan buai i kan i ṭhen ko. Kan buai tawnnak a kong le a ruang tuak hmanh u. Fale zun-ek fim kong, an thil thlen kong, an ei-din ding kong, nau ṭha tein na zoh lo, na ṭah ter tuk, na hro raak tuk hna hei ti kong, vok-ar rawl pek kong, TV channel thlen kong; bantlang hri chah sual ruang, ti-thawl khuai sual ruang, thlalang khuai ruang, chiti le cite thlet sual ruang, buh a hoh tuk le a cet tuk ruang, meh khangh ruang, inn thian lo ruang, thilbil ṭhat lo ruang, bizu khar philh ruang, mei hmih philh ruang, khuhsi cakuak le khaini a dih ruang, thawh tlai tuk ruang, hnu lei i chit ruang, zan ih ah hnaar tuk ruang, hman tawnmi; ṭhim le la, samthih, sathau, TV control, cehrep, namte, tin cehnak te hna an umnak theih lo ruang, zumput ti toih philh ruang.....hi bantuk tuktak hi mualpho in kan buai tawnmi an si ko cuh.

Hi bantuk thil tete a chuah tikah ngaihthiamnak, theihthiamnak, thlachiatruahnak, suumnak, lungsaunak, lungneemnak, zawnruahnak ngeih bu tein hrial a hau. Kan palh sual tikah, "keimah palh asi" ti le " hung ka ngaithiam" ti khawh ah cun buai le siik a um kho lo. Nangmah nih palh i cuh law midang kha thiam va coh hna.