Chungkhar Biaktheng

02Feb 2012

Biaktheng cu hmun thiang tiah ruahmi asi. Minung le Pathian an i tonnak, an i hawikomhnak le bia an i ruahnak hmun asi. Minung nih Pathian sin ah lawmhnak rai an thawinak, Pathian sin ah sual thlahnak an tuahnak le Pathian ngaihthiamnak le zaangfahnak an hmuhnak hmun asi. Kan inn ah biaktheng kan ser awk a herh ngaingai. Kawl biaknak i an inn chung ah pathian hrawl an donh bantuk khi chim duhmi asi lo. Chungkhar kan nunnak tu ah biaktheng cu a dir awk asi.

Zarhpi ni ah biakinn i kan i pumh le Pathian sin thla kan cam le thangthat hla kan sak lawng cun a za lo. Biakinn biaktheng nak in chungkhar biaktheng hi a biapi deuh. Kan caan a tam bik cu chungkhar ah kan hman caah a biapit khun nak asi. Kan umnak inn cu Pathian a umnak, vancungmi an tum an kainak le Pathian he kan i hawikomhnak hmun ah can ter a herh. Inn a chiat le a that kha a biapi lo. A chung i khua a sami chungkhar kan nunning le kan lungput kha a biapi. Chungkhar a thianhlim lo ahcun biaktheng ah hman khawh a si lo. Pathian he i ton le bia i ruah khawh asi lo.

Nu le pa cu tlangbawi dir hmun ah dir in fanu le fapa caah raithawi tu kan si awk asi. An lu cung kut chuan in thluachuah kan pek hna lai. An sualnak caah Pathian sin ah sualthlahnak hal in thla kan cam piak hna lai. Pathian nawlbia le Khrifa nunzia dawh cu kan cawnpiak hna lai. Pathian he hmante in hawikomhnak kan ngeih ahcun chungkhar ngan a dam lai. Pakhat le pakhat Pathian nih a kan dawtnak kong kan i chim hna lai. Pathian sinah lawmhnak rai kan thawi lai. Cuticun pakhat le pakhat zong palhnak kan ngeih tik ah kan i ngaihthiam lai. Thil tha kan i tuah piak tik ah lawmhnak bia kan i chim tonh lai. Cuticun chungkhar nuam kan si kho lai.