Chungkhar Timi cu

By Stanley Cung

16Jan2012

Minung cu a bu in a ummi, khua a sami kan si. Chungkhar a dirhmi zong kan si fawn. Mibu pakhat a tthatnak, a chiatnak hrampi cu chungkhar hi a si. Chungkhar an i nuamh tikah ram a nuam, chungkhar a daih tikah ram a dai, chungkhar a ngan a dam tikah ram a ngan a dam i chungkhar a tthawn tikah ram a tthawng ve. Cucaah mifim tampi nih chungkhar cu mibu pakhat sernak caah a hrampi a si an ti. Chungkhar nuam le a ngan a dammi chungkhar ser timi hi nu le pa rian lawng a si lo i fale kan i tel venak zong a biapi tuk.

Chungkhar timi cu: Chungkhar timi hi “thi le sa in ai pehtlaimi nu le pa le fale rual” lawng in rak fian ter a si. Sihmanhsehlaw chanthar mit in chungkhar timi fianternak ahcun “inn thlung thlungkhat tang i khua a sa ttimi, a ding a ei tti i khua a tuaktaan ttimi paohpaoh” i tel a si cang. Nu le pa, pi le pu, tu le fa tiin hmunkhat ah khua a sa ttimi paohpaoh kha chungkhar pakhat ah ruah a si cang. Thi le sa theng in i pehtlaih a hau lo. Kau ngai in chim ahcun vanraang toi i khua a sami minung, saram le thingkung vialte hna hmanh hi chungkhar pakhat ti khawh a si cang.

Pakhatnak: Chungkhar cu Pathian sermi a si. Khrihfami hna caah cun chungkhar timi cu minung nih ser chommi si loin Pathian nih Eden dum ah a ser i thlua a chuahmi zong a si. Pathian nih “A ttha tuk” a timi zongah khan chungkhar sernak hi ai tel. Cucaah kan chungkhar zong hi Amah Pathian sin lila ah kan ap lengmang a hau.

Pahnihnak: Chungkhar cu lungthin umnak hmun a si. Chungkhar timi cu lunglawmhnak kan i hrawmnak hmun zong a si i kan ngaihchiatnak le kan thilrit kan i tthumhnak, harnak kan ton caan ah kan i hnemhnak hmun zong a si. Chungkhar cu hnangamnak a kan petu zong a si awk a si. Kan i dornak a si fawn. Cucaah chungkhar timi cu kan lungthin a umnak hmun a si tiah an ti. Hihi Laimi nih kan bau ngaingaimi a si tiah ka ruah.

Pathumnak: Chungkhar cu zeizong vialte kan cawnnak hmun a si. Minung vialte hi mi nawl cawn in a tthang dihmi kan si. Ngakchia cu a nu le a pa chimh ning in a holhmi le a nungmi an si. Nu le pa hnu lawngah midang chimmi a ngaimi an si. Phundang cun nu le pa nunning zoh in an thang. Cucaah ngakchia cu a nu paw chung a um lio in nu le pa nih nunning cawnpiak ding a si tiah Psychology a thiammi hna nih an chim. Cucaah nu le pa ziaza le lungput hi ngakchia nih a cawnmi lungput le ziaza a si. (ram dawtnak lungput, pengtlang ttanh tuknak lungput, etc). Cucaah chungkhar cu nunzia, lungput, nun dan kan cawnnak hmun a si. Zeizong thil vialte kan cawn hmasat biknak le kan hmuh hmasat biknak cu chungkhar ah a si. Minung pakhat si lak in kan chuak i kan i sersiamnak hmun zong chungkhar hi a si.