Kamlo Chuncha

17Jan2012

Chuncha cu ka hngachiat lio tein ka hmuh lengmangmi asi. A dawh ngaingai. Ruah siamsiam in a sur lio i ni a tlan pah fawn lio ah khin a lang lengmang. Ka hawi le he kan rak dawi tawn i upa nih an kan thlauh. Chuncha nih an kulh hna ahcun nan thi lai an rak kan ti. Khuachia thilti khawhnak hmelchun asi ti lei deuh in ka rak i fian ning asi. Chuncha kong nih ka khuaruah a rak ka har ter ngaingai. 

Chuncha kong hi siangin ah ca in kan rak cawn bal. Arong phun sarih a ngei. Ruah sur han ka ah ni a tlan tik ah niceu nih ruahhmai tete a kah mi in a sem tiah kan rak cawn. Tih ding asi lo zia le khuachia he pehtlaihnak a ngeih lo zia ka hun i fiang.

Sunday School zong ah Noah buanchukcho kong an kan chimh lio ah chuncha kong cu ka rak theih rih. Pathian nih Noah sin a biakam fehternak hmelchunhnak le hmailei ahcun vulei hi mei in ka tawl cang lai ti hmelchunhnak asi tiah an rak kan chimh.

Kan pipu chan in nihin kan chan tiang kan Lai hla ah a cuang pengmi asi. Ralthatnak, lungrualnak, teinak, dawhnak le teirialnak he an chuankhan bik cem. Minung nih hin chuncha rong bang in a lo lomi dawhnak, a lo lomi santlaihnak kan ngei dih. Cu a lo lomi kan sining vialte cu hmunkhat ah kawp in kan dir ti, kan tuan ti ahcun iang le dawhnak kan ngei lai i lungrual in dir i raltha in kan nawr ahcun teinak cun kan phak zau ko lai. Ram le miphun rian kan tuannak ah siseh, Pathian kan zumhnak le a rian kan tuannak ah siseh...chuncha sin in cawn dingmi tampi kan ngei.

Innchungkhar ah khua a sami upa bik in ngakchia bik tiang kan thil ti khawhnak, kan santlaihnak a dang cio. Cucu kan fonh i kan dir ti ahcun chungkhar ah nuamhnak a leeng deuh ko lai.