A Lawmmi Chungkhar 2

10Feb.2012

Stanley Cung

A lawmmi chungkhar sinak ding ahcun tinhmi felfaite in ngeih a herh pin ah chungkhar caah caan pek a herh.

Tinhmi an ngei: Laimi nih kan chamhbau ngaimi pakhat cu zeiruangahdah chungkhar kan dirh, chungkhar hi zei caah, ti te hna hi kan i cawnpiak lo. Chungkhar nuam timi cu tinhmi an ngei. Aho an si an i thei. Zeiruangahdah chungkhar kan dirh i zeicaah dah chungkhar kan dirh ti an theih. Hmailei thil tampi khua an tuaktan. Chun mang an man. An chunmang tlinnak ding zong an i zuam. Lam an kawl. Cucaah an nunnak hi a sawhsawh hmang loin tinhmi ngei le sullam ngei tein an hman.

Caan an pek: Kan chungkhar cio zoh than a hau. Kan inn hi, kan chungkhar hi hotel bantuk ah maw kan hman, inn taktak bantuk ah dah? Kan lungthin hi kan chungkhar ah hmunh ter a hau. Kan chungkhar ah caan kan pek lo tikah kan lungthin cu hmun dang ah a um tawn. Atu chan cu thancho chan a si. Kan riantuannak le kan cawnnak, kan pawngkam thil tampi nih kan caan hi an kan chuh tawn. Cucaah chungkhar caan hi a dang tein pek hmanh ah a tha. Minung cu “kai manh lo” kan ti ahcun manh lo peng a si ko. Caan hi kanmah tein kan i ser pah a hau. Zeitluk a upa cangmi le a mature cangmi hmanh nih hin dawtnak le zohkhenhnak, caan pek cu kan herh i kan duh cio rih. Fale lei in chim ahcun nu le pa zohkhenhnak le umpinak, lam hruainak cu kan herh peng rih ko. Caan peknak nih hin tlaihchanank a chuahpi. Caan kan pek khawh lo deuhdeuh ah tlaihchannak a tlau chin lengmang ve.