A Lawmmi Chungkhar 1
Stanley Cung
29Jan2012
A ngan a dammi chungkhar hi chawva cawk khawhmi a si lo. Rumnak nih nuamhnak a
chuahpi nain lawmhnak taktak cu a chuakpi kho lo. Ihphah thatha nih mit kuh thawtnak
a pe kho hlei lo an ti tawnmi khi a si. Hi vawlei thilri hi a taktak ahcun chikkhat ca an si.
Kan herhmi thil ah an i tel nain a biapi bik tu cu a si lo. Chawva nih chungkhar nuam a
cawk khawh lo bantukin chungkhar ngandamnak zong a caw kho hlei lo. A ngan a dammi
chungkhar cu a chung i a ummi pumpak pakhat nih sak lawnglawng ah a chuak khomi a si.
Cucu zeitindah kan sak lai.
Dawtnak nih a uk: Chungkhar kong kan ruah paohah philh awk tha lomi pakhat cu
chungkhar timi cu ai dangmi ruahnak, ai khat lomi sining le pawngkam, ai dangmi duhnak
vialte fonh in dirhmi silo le sakmi a si ti hi a si. Phundang cun chungkhar timi cu i khah lonak
lawngte in sakmi a si. Kan pum chung a ummi pawl nih hi an i khat dih lo. An rian zong an
i khat cio fawn lo. Sihmanhsehlaw cu ai khat lomi hliah le caang hna nih anmah le an tuan
awk rian cio kha dawtnak le lungrual tein an tuan cio tikah pum cu a ningpi in dawtnak nih a
thang tiah cathiang nih a kan cawnpiak.
Ruahnak ai dangmi le duhnak ai dangmi, herhmi ai dang ciomi minung pakhat nak tam
umnak ah i siikcaaknak le tlamtlin lonak a um cu khuaruahhar tuk cu a rak si lo. Ai khat lomi
ruahnak, i siikcaaknak le i khah lonak pawl kha lonh in theihthiamnak, ngaihthiamnak le
dawtnak he khua a sa ti khomi si tu a biapi. Dawtnak nih ngaihthiamnak le i nawl thiamnak
a hrin. A lung a sau. A ing a puang leklek lo. Dawtnak kong cu I Korin 13:1-13 ah kan rel
lengmang. A biapi mi cu kan rel lengmang mi Cathiang ning in zulh tu a si.
Ngaihthiamnak kan ti tikah an sualnak le an palhnak va philh piak khi chim duhmi a si theng
lo. An sualnak le an palhnak, an tlam tlin lonak kha phun dang deuh in hei ruah piak khawh
khi a si. Cucu dawtnak nih a chuahpi khawh. Dawtnak nih a thuammi chungkhar cu a ngan a
dam hrimhrim ko. Mah zawn lawng ruahnak nih huatnak le rem lonak lawng a chuahpi.
